د سباوون ساحېل  - راستول شوې ليکنه 

د ننگرهار د غني خيلو ولسوالۍ په مارکو سيمه کې نن د پوليسو پر يوه رېنجر موټر د سړک غاړې د ماين په چاودنه کې درې ملکي وگړي ټپيان شوي دي. دا په داسې حال کې ده، چې د طالبانو وياند ذبيح الله مجاهد ادعا کوي، چې په دغې چاودنې کې يې پينځه پوليس سرتيري وژلې دي. 




خو د ننګرهار د امنيه قوماندانۍ وياند سمونوال عبدالغفور وايي، د غني خيلو د مارکو د سپين خوړ سيمې په ننۍ پېښه کې درې تنه ملکي وگړي ټپيان شوي او پوليسو ته مرګ ژوبله نه ده اوښتې. د ننگرهار د والي وياند احمد ضيا عبدالزى بيا وايي، دا پېښې په افغانستان کې ميشتو نړيوالو ځواکونو ته د تيلو په يوه ليږدونکي ټانکر کې د چاودنې له امله رامنځ ته شوې ده. په ننگرهار کې د پوليسو پر موټر دا چاودنه په داسې حال کې رامنځ ته کيږي، چې تيره ورځ د هيواد په څو ولايتونو کې په بېلابېلو امنيتي پېښو کې د يوه ولسوال په گډون لږ تر لږه پېنځلس پوليس سرتيري وژل شوي وو. د دولت وسله والو مخالفينو تيره ورځ ماښام د کندوز په امام صاحب ولسوالۍ کې د سرحدي پوليسو پر يوې پوستې په بريد کې نهه سرحدي پوليس ووژل. ددغه ولايت د قلعه زال ولسوال معلم نذير هم تير ماښام له خپل ورور سره د سړک غاړې د ماين په چاودنه کې ووژل شو او د زوى په گډون يې دوه تنه نور ټپيان شول. همدا راز د بدخشان ولايت په کشم ولسوالۍ کې هم تيره ورځ ناوخته د سړک غاړې د ماين په يوې چاودنې کې د دغې ولسوالۍ د لوژستيک امر له خپلو څلورو ساتونکيو سره وژل شوى دى. وسله والو طالبانو ددغو ټولو چاودنو او بريدونو پړه پر غاړه اخېستې ده. د هيواد په ناامنيو کې د پوليسو مرگ ژوبله په داسې حال کې مخ په لوړيدو ده، چې د کورنيو چارو وزارت وياند نن په کابل کې يوې خبري غونډې ته وويل، چې تيره اوونۍ په بېلابېلو پېښو کې شاوخوا ٢٣ پوليس سرتيري وژل شوي دي.